Download Free Apps & Games @ PHONEKY.com
Download Free Apps & Games @ PHONEKY.com
Subject: Demam caleg di www.forumprobal
Replies: 0 Views: 4100
sbgbali 15.01.09 - 04:09am
Demam Caleg
Sanghyang kala nenten rered-rered mencanen tatadahane. Tusing milih galah santukan akeh pesan pnyungsungnyane ring jagate. Sane pinih akeh wantah jatmane ane belog ajum, mapi-mapi ririh, bangras, basang bwak, nyapakadiaku lan tuara demen malajahin kerohanjan mawinan nuraninne mati.
Ento makada kabrebehan jagate sayan-sayan ngresin, apabuin menek kancan pakewehe nyangsan gede ulian keadilane sayan tipis, rakyat jelatane kemuk-kemuk cara dongkange lakar nyimbuh, sawireh tusing nyidayang mesuang munyi lakar mrotes pemimpinne, makada ia salah tingkah uyang paling buka lindunge uyahin.
Jagate panesbara ngarubeda ring sakancanin sarwa mauripe. Panese punika sampun ngarangsukin m ane sami, santukan jatmane mangkin kari buduh paling ngalih kawibawan lan pangarsane mangda kabinawa di jagate. Nenten mrasidayang ngungkulin sakancanin indriane sane kaanggehang taler sane kaulurin saking suwe. Wantah mesehe sane wenten ring raga sarira wiyakti sengkil ngandapang, santukan ipun manying sampun leket manunggal maring manah. Napi malih mesehe punika kaduk sampun karaksa saking alit, sinah meweh antuk ngicalang sawireh sampun kadung becik genahnyane ring anggasarira.
Sane mangkin jaman pilkada makada jatmane sane sampun biasa ngrasayang dados pemuncuk gumi tusing nyidayang ngeret indriane , tusing lega ngalepasang muncuk kakwasane ane suba kadung gisianga, wiyadinke pantesne ia suba lepas teken agem-agemane utawi sampun pansiun. Nejani makikian tahun duang tali sanga masan pemilihan umum jagi rauh, napi malih partaine makeh ngendag sekadi ong ingiane di sasih kenem kapitune ring sajebag jagat Nusantara, makejang magarang ngaptiang kedudukan apang polih dadi Caleg nomor satu. Pemimpin partai gureme sane tusing ngelah tegak di DPR uyang paling ngragrag daya apang maan kedudukan, ento makada ia cara kutu loncat masalin klambi atribut partai sane mara ngendog. Ring desa-desa ipun ngubek ngalih pendukung apang prasida maan tegak di tongose ane kadena tis. Anak mulaketo carajanine asal suba Iiu ngelah pipis wiyadinke SDM-ne puyung tuaraja ento ane dadi ukuran, sangkala jagate benyah latig dija-dija nagih otonomi khusus, sawireh setata mrasa katandes uli pusat.
I Baglur bengong sambilanga naktakin jagut masila tiding di bale siskamlinge madingehang satwane Pan Grapiak makecah-kecah ngortang gumine sedekan demam caleg. Sawireh ne jani liu pesan ada partai ane anyar ka desa-desa terpencil ngura pipis lan sembako anggona ngalih pendukung. Partaine totonan bisa masi anggona ngalih pangupajiwa teken mantan caleg-calege gugur ane suba liwat. Cara omang-omang meseh umah ngalih kesempatan makeles uli partaine ane malu, jani ngalih partai ane anyar. Cutetne lamon suba maan dadi pemimpin di partaine ane baru sinah ia maan areal bisnis ane menggiurkan. Keto masi masyarakate ane tusing ngelah gaginan gegem utawi ane dadi pengangguran, sabilang sanja mabunbun di bale bengong ngantosang tatadahan. Biasane ane imalune soroh pemimpin partaine ane memanfaatkan pemuda penganggurane, kwala nejani mabalik jamane, sabilang ada morta anak lakar dadi Caleg, jog jagana di kamling, yen kabenengan lewat jag borosina pesenga apang nyak dadi sponsor partai nraktir sarwa minuman lan sarwa dadaharan mapesta dadakan. N a h neja Gede Tanglus ortane lakar dadi caleg nomor satu di Partai Nasbedag' Jalan anake mapesta malu, yensing nyak keto... cutetne tusiangada jlemane di sajebag desane dini lakar milih partai Caine. Keto sasuwak truna-truna penganggurane ane makumpul di kamling. Ento makada I Gede Tanglus prajanian nraktir minuman bir macampur ban tuak teken lawar utawi beguling, cager teken dewekne pasti lakar piliha duriane. Keto suba alikan gumine jani tusing nyidayang ngrombak sawireh ulian tusingada gagaen ento makada liu trunane jagiran tuara ngelah gaginan ane tetep, sangkala lamon suba nyaluk sanja jag makumpul dibalai siskamling ngantosang bakal calege lewat diaepane, sabilang ada caleg ane lewat pasti grunyunga todonga teken janji-janji lakar milih partene ane ngusung dewekne lakar dadi caleg. Anak mulaketo soroh penganggurane ane ngumbar janji, kuala prajanian nagih upah marupa pesta minuman lan lagaran teken uang saku, jawat duriane tuaraja seken lakar milih parten calege totonan, ane penting nyidang mapesta gumanti mamunyah. Ento makada ane lakar menek dadi caleg milu mamunyah ngura pipis. Ada caleg ane nyabran peteng gebagina teken pendukungne gumanti ka gan, sinah suba calege totonan sabilang peteng nelasang makudang-kudang botol bir teken penyatusan nasi bu*ngkus bekelanga magadang.
Weih, akuda ajak Nani manyama, catet makejang lakar bang wake suang-suang pipis seketali, kuala kayang pemilune ingetang coblos nomor urut wakene . keto raosne ane dadi caleg partai anyare.
I Gede Cager malengok di tanggun desa di batan kayune gede carangne ngarembyak. Yen suba kudang jam baana bengong mapangsegan ditu, paliatne nrawngsawa sarasa pikirane nyalupsup di tengah ambarane cliak-cliuk di ambune mapinda istana di Kerajaan Megambara. Sabilang jahan gobane maseh, di kenkene nadak muane baag biing, dikenkene meseh warnan muane putih lesit cara tusing magetih. Tusing tawnga dewekne uling itunian awasina teken I Baglur.
Kenken dadi sebenge cara anak engsek, buka anake kalain tunangan, Gde Cager?
I Gede Cager tuara rungu-tuara ningeh teken patakone I Baglur, sawireh kenehne suba nylupsup di tengah ambune ane pajlompot di ambarane ngiasin langite ritatkala sasih kapate anak mula rariane galang maglanaran tur langite pelung nyalang. I Baglur nesekang sambilang nyeebin tur telapakan limane kebetanga di aepan muane I Gede Cager, kuala ia tileh malengok peningalane kedat cara matan penyu tusing makijapan nyang abedik. I Baglur mara sadar teken deweke nyatwa teken anak ngalamun, lantas ia nundikin makada I Gede Cager makesyab ngtabtab.
Beh Bli Baglur, suba uling inuni Bli disamping Icange?
Sing..., mara akijapan barong. Man Gede Cager anak ngudiang malengok ngolol cara bojoge nelektekang bulan ? Sabilang jahan sebenge melenan, apa kal pikir dadi ruwet gatine ulesne ?
I Gede Cager madabdaban makeseran ngamalahang tegakne dipadange tur nyedot angkihan lantang, makada paru-parunne mrasa seger sawireh udarane mula bersih di tanggun desane. Pemandangan carike sedekan misi pamulan padine suba beling warnane gadang lumlum. Cecapunge pada matinggah di muncuk-muncuk punyan padine makada manahe ngulangunin ngajinang kamelahan panoramane di padesan.
Kene Bli Baglur, icang kaliwat sebet teken dewek, sawirah suba mrasa cager lakar maan nomor satu di legislatif, kuala tatag-tutugne mara delokin di papan pengumuman partene jag nomor dua Icang baanga. Sinah suba Icang sebet gati mapan partaine ane dukung icang anak partai anyar, sinah tusing cager teken dewek lakar prasida negak di legislatif mapan partaine partai gurem.
Man man kenkentas jani?
Beh jengah pesan bayun Icange, mapan partai gurem kaden ja tusing mayah, ternyata ane prasida maan kedudukan di nomor satu anak ia nyogok kone telungdasa yuta, ento makada Icang bingung tur sebet teken dewek.
Oh, dong keto ngranang Gede Cager malengok dini ? Pantes suba Gede sebet mapan suba tawng gajih anake dadi DPR gede. Diapin keto eda nto sebetanga, liu nu ada jalan ane pantes lakonin mapan liu sajan ada partai sinah gampang Gede nyalonang dewek, ane penting ngelah pipis masembong.
Beh sukeh sajan baan Icang madaya, Bli Baglur. Galah penutupane mendaftar dadi calon DPR suba nangsek, pipis tuara nyekuk nyang aketeng ane iyug. Kenkenang baan madaya jani apang prasidaja maan dadi caleg ane nomor satu ?
Sagetang masuara sepeda motore magrueng di sampingre negak, I Ketut Grapiak nesekang tur ngeltekang kunci motorne, aris mareren tur bareng nimbrung sig tongosne I Baglur sedekan makecah kecah ngortang aabe jani liu pesan anake demam caleg. I Grapiak nongkrak montorne tur pajalane masrengkodan mapan ia ngandong tas badeng aris nesek lantas milu ngenco. Konden ada apakpakan base saget teka pemuda-pemuda desane pada ngalongan anduk di baongne ajaka pitu ngojog kema. Anak mulaketo sabilang nyaluk sanja ia marerod lakar manjus ka tukade di sisin umane, sakabesik negak ngurung I Cager ngajak I Baglur. Ortane sayan rame makada I Cager mrasa terhibur tur mrasidayang ngengsapang sebete ane itunian.
Kone Bli Cager lakar milu mendaftar dadi caleg Partai Cupak man kenken sing payu ?
I Gede Cager bin malengok sambilanga ngiwasin rombongan kedis kepecitane makeber miber di ambarane lakar ngalih pangupajiwa sig padine ane kuning tongosne joh apeneleng uli sig tongosne I Cager. Sagetang masaut I Grapiak suarane kenceng jangih.
Bah..., eda bas keras berpikir! Yen lakar dadi caleg tusing pantes iraga kanti stress ulian tusing maan nomor satu. Jani gedenang bayune optimisang ibane apang tusing gara-gara tenenan idewek kena S3(Stress Struk Setra)
Man kenken carane apang prasida ngegul di nomor satu ?
Masalah sepele-to...! keto pasautne I Grapiak sambilanga ngrekeng reksreting tasne sagetang mesuang produk susu Naco ane keluaran pabrik luar negeri. ne konsumsi malu akotak jag makada gede bayune, anak susu kolostrum-ne pengurip bayu ane nomor satu. Keto satwane renyah makecah-kecah mromosiang susu. I Grapiak anak mula duweg ngalih galah tepat waktu, buina suba sai-sai ngenen jaetne ane suba liwat makudang-kudang pemimpin partai suba meli susu teken dewekne. Anake ane bareng nimbrung ditu ngaat milu madingehang promosinne I Grapiak anak mula terkenal jagoan madagang sawatakin macem bisnis, ulidi dadi tukang ngamaklarin ngae surat-surat tanah teken bisnis mendahan, sawireh pengalaman hidupne jimbar pesan makada ia sukses.
Beh Bli Grepiak, suud jani dadi pegawai negeri madagang susu jani ao...? keto patakone I Baglur sambilanga kemak-kemik maca brosur merk susune N.. A..C..O Susu Bubuk Skim Produk of New Zealand . Hubungi HP 08179782421. Beh, uli luar negeri susune tenenan. Keto I Baglur sambilanga ngenjuhang brosur susune teken I Gede Cager.
Truna-trunane ane bareng ngrembug ditu milu masi ngon ngiwasin susu produk barune totonan. Sagetang I Gede Cager maan inspirasi nibakang daya upaya apang maan ngalih pendukung lantas nraktir makejang trunane seduhanga susu padama saset.
Icang lakar nyumu mendaftarkan bin dadi caleg di Partai Cupak' tolong dukung Icang apang prasida dadi DPR.
Beres...! keto masuryak truna-trunane ane suba suud nginum susu. sawireh galahe suba sanja, saluh ukud jlemane bangun ngalantas rarembugane bubar.
I Gede Cager petenge tusing dadi pules ngingetang kegagalane sane itunian di papan pengumumane ia maan urut nomor 2. Paningalane tusing dadi kidemanga makada pesu yeh melusin pipine kasap mawarna sabo tasak, igan-igan umahne meh apangkuda kaden peteka uli di teben kanti ka luan bulak - balik. Kenken carane ngrikrik daya apang prasida maan nomor 1. Mani gane enggal-enggal ia kumahne I Grapiak ngaba pipil tanah.
Tooh, anak ngudiang Gede Cager dadi sinah-sinahe teka mai, apa ane buatang ? Beh, pasti suba tawnga melah susune, lakar ngalih susu bin akotak ? Neeh Icang anak nu namping telung kotak. Keto I Grapiak matakon sambilanga nanjenin susu.
Sing, keneto Bli Grapiak, acepan Icange mai tusingada lenan teken lakar ngidih tulung teken Bli Grapiak.
Nah, lamon suba dogen I cang mrasidayang nulungin beres to, n maksudne ngidih tulung apa-to ? keto pasahutne I Grapiak sambilang ngedeng tamiunne ajaka ka ruang tamu lantas negak di korsi penyaline.
Tulungin adepang Icang tanah.
Ngadep Tanah ? Lakar anggon gena pipis pamelin tanahe ?
Lakar anggon Icang nyogok pimpinan Partai Cupake telungdasa yuta. Jani adepang Icang tanah mone are ajine telungatus yuta.
Dadi liugati ngediang tanah, lakar gena sisan pipise satak pitung dasa yuta ?
Lakar anggon cadangan ngalih pemilih, anggon mapesta sabilang peteng apang di hari H pemilihan umume parten icange menang. Masahut I Grapiak,
Bah..., sing money politik adane to ?
Jawat keto, ane penting kan menang.
Man yen mamodal telungatus yuta gajian apangkuda ento lakar mrasidayang ngelunasang pamelin tanahe? Sing lakara pocol duriane mesuang prabia bes gedene buka sinonggane medil capung nganggon meriem' pipis telah makutang-kutang pikolihne tusing nyidang ngamah ?
I Gede Cager malengok minehin munyine I Grapiak, sinah suba tuturne melah, kuala yen guguna satwane I Grapiak dewekne mrasa keciwa teken kegagalane ane suba liwat gembar-gembor ngaku paling dueg tatag-tutugne ia tusing maan pilihan rakyat. Nejani makejang soroh dedengkot Orde Barune ane dugas imalune suba tuara kanggo, kwala jani galak nangunang macem-macem partai, mapan ia optimis teken raga lakar maan kedudukan di tampuk pemerintahane, apabuin liu lakar ada galah mencalonkan diri dadi Capres lan Cawapres. Miribne tahun 2009 sane pacang rawuh pesta demokrasine lakar paling meriah ulian liune anake dadi kandidat menuju kursi presiden.
Badah, yen, kene unduke duriane nyangsan berat rakyate. Sinah gumine sayan-sayan benyah suwireh ane dadi wakil rakyat soroh jlema ane ngulehang kepentingan padidi dogen, tuaraja (lakar inget memperjuangcan, trakyat kecil.
Keto I Sompret ngrenggeng kipak-kipek ktapak-ktepek maklieng.
I Wayan Sadha *
